அகம்

பனிமழை ... -------------------------------- அதிகாலை எழுந்து  கண்களை கசக்கிக்கொண்டு சிலந்தி வலையில்  துளையிட்டு செல்வது போல் கைகளால் விலக்கியவாறு புருவங்களை குவித்து கூர்ந்து கவனித்தபடி  வாசலில் பிரவேசிக்கிறேன் பனிமழை கொஞ்சம் கொஞ்சமாக என்னை முழுவதும் நனைத்துவிட முயற்சிக்கிறது தலையில் முண்டாசு கட்டிக்கொண்டு முகக் கவசம் அணிந்த பின் மெதுவாக நடந்து செல்கிறேன் பறந்து வந்து இமைகளில் அமரும் பனித் தூறல் மொட்டுகள் மழலைகள் கைகளில் அள்ளித் தெளிக்கும் தண்ணீர்த் துளிகளைப் போல் ஆகாய வெளியில் சிதறிக் கொண்டேயிருக்கிறது பல ஞாபகங்கள் மனதுக்குள்ளே  வந்து போனாலும் பனிமழை  என் ஈர மனதுக்குள் சாரல் மிகுந்த குளிர் வாசனையோடு பொழிந்துகொண்டே உள்ளது பெரும் அடை மழையாக ...                        - ஆம்பல் காமராஜ்.

தைத் திருநாளே ... --------------------------------------- நேற்றைக்குதான் தெரியும் இன்றுதான்  நீ வருகின்றாய் என்று பொருளாதார நெருக்கடியில் பூமியோடு அறையப்பட்ட என்னால்  எழுந்து கூட மகிழ்ச்சியாக வரவேற்க முடியவில்லை புத்தாடை உடுத்தி பொட்டு இட்டு உன்னை அலங்காரம் செய்ய கூட அருகதை அற்றவனாக இருக்கிறேன் எப்படி இருந்தாலும் எல்லோருக்கும் வருவதைப் போல எங்கள் வீட்டுக்கும் நீ வந்துவிட்டுதான் போவாய் வா தைத் திருநாள்  பெருமகளே ...                           - ஆம்பல் காமராஜ்.

நதி காய்ந்து போனது விவசாயி கண்ணீர் சிந்தினான் ...           - ஆம்பல் காமராஜ்.

மழை வணக்கம் ... -------------------------------------------- காலை, மதியம், இரவுக்கு என்று எனது ஊர் மழை அதிகாலையிலயே வந்து வணக்கங்களை அழுத்தமாக சொல்லிவிட்டுப் போய்விடுகிறது ஆதலாலயே நாள் முழுதும் வெளிப் பயணம்  ஏதும் செல்லாமல் வீட்டிலயே  தங்கிவிடுகிறேன்.          - ஆம்பல் காமராஜ்.

வான் புகழ் மழை அதிகாரம் ...              -ஆம்பல் காமராஜ்.

அப்பா இறந்த வருடம் - 1981 -------------------------------------------------------------- தலையில் முண்டாசு கட்டிக்கொண்டு அப்பா கிளம்பும்போது அழுதுகொண்டு பின்னாடியே ஓடுவேன் தூக்கி தோளில் வைத்தபடி  வேலை இடத்திற்கு நடந்து செல்வார் பெட்டிக்கடை தென்பட்டால் பெரிய பொரி உருண்டை வாங்கிக் கொடுப்பார் சாலையில் ஓரமாக விற்கும் வெள்ளரிப் பழம் வாங்கித் தருவார் சைக்கிளில் கூவி விற்பனை செய்பவரிடம் குச்சி ஐஸ் வாங்கிக் கொடுப்பார் வாரச் சந்தைக்கு  பாய் விற்கப்போனால் வரும்போது தட்டக்காரப்பொடி(மீன்) வாங்கி வருவார் வேலை செய்த இடத்தில் கூலி கொடுத்தால் மாலை வீட்டுக்கு வரும்போது வாழைப்பழம், ரஸ்க் வாங்கி வருவார் இல்லையேல்  வெறும் கை வீசிய கைதான் அம்மா கேட்டால் அடிக்க கையை ஓங்குவார் அவ்வளவு கோபம் வரும் அப்பாவுக்கு "அவெங்கெ கெடந்துட்டுப் போறாங்கெடீ  செஞ்ச வேலைக்கு கூலி கொடுக்காத வக்கத்தெ பயலுவ நீ சோறப் போடுறீ ..." என்பார் "வீட்ல என்ன இருக்கு  ஒணக்கையா பொங்கி புளி தடவி வைக்க" என்று அம்மா சொல்லும்போது இருவருக்கும் சண்டை மெதுவாக ஆரம்பிக்கும் நானும் அண்ணன்களும்  ஒரு மூலையில் போய் படுத்துக்கொ...