அப்பா இறந்த வருடம் - 1981

அப்பா இறந்த வருடம் - 1981
--------------------------------------------------------------
தலையில் முண்டாசு கட்டிக்கொண்டு
அப்பா கிளம்பும்போது
அழுதுகொண்டு பின்னாடியே ஓடுவேன்
தூக்கி தோளில் வைத்தபடி 
வெளியெங்கும் நடந்து செல்வார்
பெட்டிக்கடை தென்பட்டால்
பெரிய பொரி உருண்டை வாங்கிக் கொடுப்பார்
சாலையில் ஓரமாக விற்கும்
வெள்ளரிப் பழம் வாங்கித் தருவார்
சைக்கிளில் கூவி விற்பனை செய்பவரிடம்
குச்சி ஐஸ் வாங்கிக் கொடுப்பார்
வாரச் சந்தைக்கு 
பாய் விற்கப்போனால்
வரும்போது தட்டக்காரப்பொடி(மீன்)
வாங்கி வருவார்
வேலை செய்த இடத்தில் கூலி கொடுத்தால்
மாலை வீட்டுக்கு வரும்போது
வாழைப்பழம், ரஸ்க் வாங்கி வருவார்
இல்லையேல் 
வெறும் கை வீசிய கைதான்
அம்மா கேட்டால்
அடிக்க கையை ஓங்குவார்
அவ்வளவு கோபம் வரும் அப்பாவுக்கு
"அவெங்கெ கெடந்துட்டுப் போறாங்கெடீ 
செஞ்ச வேலைக்கு கூலி கொடுக்காத வக்கத்தெ பயலுவ
நீ சோறப் போடுறீ ..." என்பார்
"வீட்ல என்ன இருக்கு 
ஒணக்கையா பொங்கி புளி தடவி வைக்க" என்று
அம்மா சொல்லும்போது
இருவருக்கும் சண்டை மெதுவாக ஆரம்பிக்கும்
நானும் அண்ணன்களும் 
ஒரு மூலையில் போய் படுத்துக்கொள்வோம்
இரவு பட்டினியோடு தூங்கி
காலையில் எழுந்தால் 
வயிறு அலங்க மலங்க கொலையா பசிக்கும்
அந்த ஏழு வயதில்
இதுக்கு மேல 
வேறு என்னதான் ஞாபகம் இருக்கும் ...   
                        - ஆம்பல் காமராஜ்.

Popular posts from this blog

சிவப்பு சிந்தனையாளன் தோழர் எஸ். ஏ. முருகையன்.

சிவப்பு சிந்தனையாளன் தோழர் எஸ். ஏ. முருகையன் -------------------------------------------------------------- ஒன்றுபட்ட தஞ்சை மாவட்டத்தில் இந்திய கம்யூனிஸ்ட் கட்சியில் மிக முக்கியமான தலைவர்களில் ஒருவர் தோழர் எஸ். ஏ. முருகையன். ஆம்பலாப்பட்டில் முதன் முதலாக1943-ல் கம்யூனிஸ்ட் கட்சி கிளை துவங்கியபோது து. கதிரேசன், காமாட்சி, வே. அ. சுப்பையன் அல்லாடி அண்ணாமலை போன்ற தலைவர்களோடு தோழர் எஸ். ஏ. எம் என்று எல்லோராலும் அன்போடு அழைக்கக் கூடிய எஸ். ஏ. முருகையனும் ஒருவர். ஆம்பலாப்பட்டு தெற்கில் விவசாயக் கூலித் தொழிலாளர்கள் அரசு புறம்போக்கு நிலத்தில் விவசாயம் செய்துகொண்டு இருந்ததை பறித்து மதுக்கூர் ஜமீன்தாரின் கையாட்களுக்கு பிரித்து கொடுத்தார்கள். இதனால் அன்றாடம் பிழைப்பு நடத்த முடியாமல் விவசாயக் கூலித் தொழிலாளர்கள் ஜமீன் இடம் கடன் வாங்கி இருந்தார்கள். அதற்கு ஒன்றுக்குப் பத்தாக நோட்டு எழுதி வாங்கி வைத்துக்கொண்டு தொழிலாளர்களை மிரட்டியதற்காகவும், ஏழைக் கூலித் தொழிலாளர்களிடம் பறித்த நிலத்தை மீண்டும் அவர்களுக்கே வழங்கு. "உழுபவனுக்கே நிலம் சொந்தம்" என மதுக்கூர் ஜமீன்தாரை எதிர்த்து தனது தோழர்களோ...
Read more